حوار: سهام السعيد جوده
الشاب الموهوب محمد عمر صاحب الطله وخفة الدم، والذي أحب الفن في سن السادسة، واتخذ من الفنان الكبير ملك الكوميديا إسماعيل ياسين قدوة له وبدأ يقلده في البيت و المدرسه ويقول محمد لسبأ نيوز"كنت طالب فى سنه أولى ابتدائى و شافونى زمايلى راحو قالو عليا لمدرس العربى و بالفعل جه و طلعنى على السبوره اقلد لزمايلى وروحنا لمدير المدرسه و قالو الطالب ده بيعرف يقلد اسماعيل يسن فا رشحونى لحفله عيد أم و كنت انا منظم الحفل و نجحت بإقتدار و اتكرمت ساعتها من مدير المدرسه و كان أول تكريم ليا فى حياتى شهاده تقدير و 20 جنيه و قلم جاف".
وأكمل الشاب الموهوب قائلاً"بعد الحفله ما انتهت أشادو بيا كل المدرسين و بعض الشخصيات اللى كانت حاضره من وزاره التربيه والتعليم فى الحفله و بدأ عمى يشجعنى و يدعمنى هو والدى وبدأت أنمى موهبتى و ازداد فى عدد تقليد الفنانين و بدأوا يرشحونى لمركز شباب الحصه بالقليوبيه عشان امسك النشاط المسرحى فيه وأنظم فيه الفقرات الفنيه و شاركت فيه 3 سنوات و ده كان عام 1999 لحد ما جت فرصه و بعتولى فى مركز شباب طوخ و عملت معاهم اكتر من 5 حفلات، و اتأهلت إلى قصر ثقافه بنها لما طلبونى بالإسم إن هشارك فى حفله قدام المحافظ عدلى حسين محافظ القليوبيه السابق و بالفعل نجحت و اتكرمت من سياده المحافظ على مسرح قصر ثقافه بنها و انا فى الإعدادى، وكانت فيه مسرحيه بعنوان، دم مسلم ، كانت من تأليفى و إخراجي.
وأكمل ..نجحت المسرحيه و كنت انا اللى مصمم الديكور و الملابس و الاكسسوار لكل الطلبه اللى دربتهم ازاى يمثلو معايا فيها لان المسرحيه كانت صعبه و بتناقش قضيه بتتكلم على حقوق فلسطين و العراق و أفغانستان و الشيشان و امريكا و اسرائيل و مضمونها كان بيقول إن ما ينفعش نكون اخوه و نقف نتفرج على دم الاخ المسلم وهو بيتهدر قدامنا كاعرب و إخوه، ومن من ضمن كلمات الغنوه فى العرض كانت بتقول أبدأ منين و الكلام غايب.. الحرف فوق طرف اللسان دايب.. القدس تصرخ على الرجال فين الحبايب ..
أول إحساس بالنجاح
حصل محمد عمر علي مركز أول تمثيل و إخراج على مستوى المحافظه و اتقدم فى برنامج بيقدم مواهب للاطفال بعنوان "الكتكوت الفصيح "وكان يذاع على القناه الثانيه وفي نفس الوقت كان بيصور فى دار الأوبرا المصرية.
وأكمل محمد حديثه في لهفة ل"سبأ نيوز" ،، كنت اول مره ادخل دار الأوبرا ،وقدمت مشهدين احدهم من مسلسل ذئاب الجبل وكنت بجسد شخصيه الفنان القدير عبدالله غيث فى دور علوان ابو البكرى و عملت دويتو يجمع ما بينه هو والفنان أحمد ماهر دبور الدكش، ومثلت مشهد للفنان العبقرى أحمد زكى و شافنى بالصدفه و ساعتها أ. أحمد عادل منتج البرنامج بلغنى أن استاذ أحمد زكى شافنى بالصدفه فى التلفزيون وانا بقلده فى مشهد من فيلم أيام السادات و أعجب بيا و كنت فرحان جدا ساعتها بعد كده انطلبت فى برنامج اسمه" لقطات ارشيفيه ضاحكه" و ده كان بيذاع على القناه السادسه و قدمت فقره فنيه ،وبعد كده دخلت برنامج مواهب على الهواء القناه الثالثه مع المخرجه منال محروس اللى قالتلى انت أساسى فى البرنامج ده و مش هسيبك و بالفعل استمريت لحد 4 سنوات فى البرنامج و قدمت معاهم العديد من الحلقات من تقليد ل تمثيل ل مونولوج وكنت فى الوقت ده طالب بالمرحله الثانويه و من خلال حبى للفن أول ما خلصت الثانوى روحت قدمت فى المعهد العالي للفنون المسرحية و انا طالب فى أولى معهد قابلت المخرج الكبير مجدى ابو عميره و مثلت مشهد قدامه عجبه جدا ..
اول مسلسل شارك فيه
وعند سؤاله عن اول مسلسل شارك فيه أجاب محمد قائلا أن المخرج مجدي ابو عميره رشحه فى مسلسل قلب ميت مع النجم شريف منير و النجمه غاده عادل و ده كان أول مسلسل تلفزيونى اعمله فى حياتى و كنت طالع بدور وهدان ابن الفنانه عفاف رشاد و من كتر حب المخرج مجدى أبو عميره ليا فى اتقان اللهجه الصعيديه صمم إن أكون صعيدى فى المسلسل.
واضاف محمد " شاركت بعدها فى العديد من ال مسلسلات و العديد من المسرحيات و المسلسلات الإذاعيه و الاعلانات و البرامج مع كبار نجوم مصر أمثال محمد هنيدى ..سامح حسين .. هانى رمزى .. أحمدماهر .. صفاء ابو السعود .. سهير المرشدى .. علا غانم .. شريف منير .. غاده عادل .. أحمد عزمى .. محمد الصاوى .. احمد سلامه .. خالد سرحان .. مى كساب .. نشوى مصطفى .. محمد عبدالجواد ... محمد متولى .. فاروق نجيب .. سامى مغاورى .. ماجده زكى و غيرهم العديد من كبار النجوم.
أهم الأعمال
دم مسلم .. يسن و بهيه .. العذاب على مر العصور .. نلتقى بعد الثوره .. الغريب .. شجر الدر .. البيت الكبير .. اول يوم جواز .. شباب فى عين الرسول.. قلب ميت .. عريس ديلڤرى..سقوط الخلافه .. أشجار النار .. فندق رايق .. قشطه و عسل .. واكلنها والعه . قوت القلوب .. عزيز و غالى .. بينى و بينك .. بيت العز .. كتالوج تيتا .. كيمونتى من فضلك ..أبواب الشر و فيلم معانا ريال للمخرج مروان الدين وهبه و ده كان أيام الثوره و حاليا فيلم مذكرات أمنيه اللى هيعرض قريبا بإذن الله.
كما قدم محمد عددا من المسرحيات بالمشاركة مع النجوم مثل مسرحية تهييس إبليس، أحفاد إبليس.
الإعلانات التي قدمها
ذكر محمد أن أول إعلان قدمه كان لأحد المنتجات ،وبعد نجاحه قدم إعلان الحج السياحى بطوله مطلقه وإعلان بوابات آمان للحج و العمره مع النجم حماده هلال.
وعن أحدث الأعمال التي شارك بها مسلسل أبويا شقيقى مع النجم محمد هنيدى و مسلسل كيمونتى من فضلك مع الفنانه الكبيره صفاء ابو السعود و النجمين خالد سرحان و نشوى مصطفى.
الجوائز
وحصل النجم الموهوب محمد عمر علي جائزه أفضل ممثل مركز أول من مهرجان الفنون العربيه عام 2017 على مستوى محافظه القاهره، وحصل أيضا علي جائزه افضل ممثل فى مشروع التخرج بالمعهد من خلال مسرحيه الغريب عام 2011 ،إضافه الى العديد من شهادات التقدير و الأوسمه و الدروع كوسام التمييز و الإبداع من المركز المصرى للسلام العالمى و حقوق الإنسان بدرجه سفير الفنون الثقافه لدى المركز المصرى للسلام العالمى و حقوق الإنسان.
وذكر محمد عمر الفنان الموهوب أن لديه العديد من الهوايات المفضله مثل التأليف وكتابه الأشعار وأيضا القراءه و الموسيقى.
